1. Af því að Evrópusambandið er einstakt og ótrúlega vel heppnað samstarf þjóða. Það hefur skilað friði og framförum og bætt lífsgæði fólks innan landamæra sinna og utan.
—–
2. Af því að við erum ekki ein í heiminum. Af því að alþjóðavæðingin hefur skellt okkur jarðarbúum í einn og sama bátinn. Við sjálf höfum t.d. sjaldan kynnst því eins og síðustu mánuði hvernig breytileg sjávarföll á Wall-Street geta skollið á okkur af fullum þunga.
—–
3. Af því að með aðild fáum við á endanum gjaldmiðil sem tryggir fyrirtækjum markaði, fjármagn og stöðugt rekstrarumhverfi. Evran tryggir stúdentum betri tækifæri til mennta, almenningi sanngjarna vexti og ferðamönnum heiminn.
—–
4. Af því að Evrópusambandið er að sumu leyti þróaðra og fullkomnara í nálgun sinni á brýn pólitísk viðfangsefni, heldur en okkar eigið stjórnkerfi og stjórnmálaflokkar.
—–
5. Af því að í Evrópusambandinu er rík lýðræðishefð, sem er byggð á grunni ítarlegrar málsmeðferðar og málefnalegrar ákvörðunartöku. Litlar þjóðir hafa mikið að segja innan Sambandsins og stærri þjóðir sem reyna að kúga minni þjóðir eru litnar hornauga. Fyrir þá sem trúa því að þjóðir geti bara verið með eða á móti manni, þá eigum við fjölmargar vinarþjóðir innan sambandsins. Við eigum almenning í Evrópu sem kaus okkur í Eurovision, þrátt fyrir að óvandaðir bankamenn hafi verið nýbúnir að stela sparifé þeirra, og þrátt fyrir að lífeyrissjóðir þeirra og bankar hafi þurft að afskrifa 6000 milljarða vegna Íslendinga.
—–
6. Af því að Evrópusambandið er friðarbandalag. Það er siðlegasti leikandinn og áhrifavaldurinn í alþjóðlegum stjórnmálum. Bandaríkin pynta fólk og fangelsa án dóms og laga. Kínverjar loka á Internetið og skerða málfrelsi (íslensk stjórnvöld hafa hingað til kosið að halla sér helst að þessum tveimur þjóðum). Rússland hefur ríkisvætt misskiptingu auðs.
Nei, Evrópusambandið er rétti vettvangurinn ef menn hafa áhuga á að breyta heiminum til góðs (halló VG-liðar?!?).
—–
7. Af því að Evrópusambandið stendur vörð um hagsmuni neytenda. Gegn ótrúlegum og vaxandi áhrifum stórfyrirtækja, þá hefur ESB sagt stopp. Þeir hafa stoppað Microsoft í einokunartilburðum. Þeir hafa hindrað samruna sem hamla myndu heilbrigðri samkeppni. Og þeir hafa fengið farsímaframleiðendur til að samþykkja einn staðal fyrir hleðslutæki fyrir farsíma. Íslenskir neytendur geta rifjað upp olíusamráðsmálið til að meta frammistöðu eigin stjórnvalda á þessu sviði.
—–
8. Af því að Evrópusambandið er lítið apparat. Það er ekki bákn. Það er hins vegar hægfara vegna þess mikla samráðs og upplýsingaöflunar sem fylgir allri ákvarðanatöku stofnanna þess. Sem getur verið kostur. Það eru ekki teknar geðþóttaákvarðanir í Brussel. Sambandið er ekki gallalaust frekar en önnur mannana verk. En á alla sanngjarna mælikvarða er það svo til fullkomið.
—–
9. Af því að Evrópusambandið er fremst í heimi í þróunarmálum. Já og umhverfismálum. Sem eru tvær hliðar á sama peningnum. Þeir eru miklu betri í þessu en við og okkar stjórnmálamenn. Á þessum sviðum erum við eins og illa upplýstir ríkisbubbar. Við höfum aðgang að menntun og peningum til að vera framarlega í þessum málum. En okkur er bara andsk. sama og kjósum frekar að sitja með höfuðið fast upp í okkar feita rassi.
—–
10. Af því að með aðild að Evrópusambandinu þá endurheimtum við hluta af sjálfstæði okkar, sem áður var tapað. Ekki sem þjóð eða þjóðrembur. Þjóðin er og verður áfram fullvalda. Heldur sem borgarar. Við fáum beina aðkomu að ákvörðunum og löggjöf sem snerta okkar daglega líf og sem eftir tilkomu EES-samningsins hafa komið til okkar fullbúnar til innleiðingar.
—–
Ein auka ástæða. Og þetta er mín persónulega ástæða fyrir því afhverju ég vil að Ísland gangi til liðs við samstarf Evrópuþjóða í ESB.
10 b) Af því að okkur ber skylda til að leggja eitthvað af mörkum. Að taka þátt. Af því að við höfum eitthvað fram að færa. Við eigum að ganga hnarreist til liðs við þjóðir Evrópu. Við eigum ekki að koma til borðsins með þrönga sérhagsmuni fyrst og fremst, heldur með okkar sjónarhorn á mannúð, mannlíf og sambúð í þessum heimshluta. Okkar sýn á framtíðina - vonir og væntingar. Við eigum að treysta væntanlegum viðsemjendum okkar til að virða og skilja sögu okkar og menningu. Já og einnig sérstaka hagsmuni okkar. En ekki í formi skilyrða, heldur með samstarfsanda að vopni og á jafningjagrundvelli.
—–
Ég treysti samningamönnum okkar til að koma með samning sem þjóðin samþykkir.
Ég ætla líka að treysta stjórnmálamönnunum okkar til að sannfæra og upplýsa þjóðina um afhverju það er betra að vera með og taka þátt í alþjóðasamstarfi vinaþjóða okkar í Evrópu, heldur en að sitja einangruð úti í horni, tuldrandi um gróða á daginn og grill á kvöldin.
Góðar stundir :)
15 ummæli
RSS-veita fyrir þessa færslu
Trackback link
http://andres.eyjan.is/wp-trackback.php?p=1298
17. júlí, 2009 at 5:38 fh.
Pingback from Friðjón og bláu appelsínurnar - Friðjón R. Friðjónsson » Blog Archive » Á alla sanngjarna mælikvarða er [ESB] fullkomið
5. janúar, 2010 at 7:33 fh.
Pingback from Andrés Jóns · Gamalreyndur framfarahemill rumskar
16. júlí, 2009 at 9:40 eh.
Kolbeinn
Heyr, fokking heyr!
16. júlí, 2009 at 10:15 eh.
Lissy
Poetic.
16. júlí, 2009 at 11:08 eh.
elmar
Mig langar aðeins að gera eina athugasemd við eitt þessara 10 atriða, atriði 5 og aðeins hluta þess. Ekki vegna þess að ég sé endilega ósammála inntaki þeirra. En mig langar að vitna í orð Bismarcks, orð sem enn standa óhögguð. Þjóðir eiga ekki vini, þær eiga hagsmuni.
16. júlí, 2009 at 11:32 eh.
Lára Hanna
Elmar og Bismarck góðir!
Veistu hvernig maður kemst í samninganefndina, Andrés?
16. júlí, 2009 at 11:34 eh.
Pétur
Heyr, heyr, í blöðin með þetta.
17. júlí, 2009 at 12:12 fh.
Arinbjörn Kúld
En við erum svo spes þannig að við fáum allt fyrir ekkert er það ekki :-)
17. júlí, 2009 at 12:26 fh.
Ásgrímur Sverrisson
Frábært Andrés, alveg sérstaklega 10b.
17. júlí, 2009 at 1:28 fh.
Jón H. Eiríksson
Takk fyrir þetta Andrés… :-) Tær snilld. Svo hjartanlega sammála 10b.
17. júlí, 2009 at 6:11 fh.
Einar Örn
Fínn pistill, Andrés.
17. júlí, 2009 at 7:44 fh.
Haraldur
Þú ert klár. Nærð að orða hlutina virkilega vel. Takk fyrir þetta, ég er innilega sammála þér.
17. júlí, 2009 at 9:07 fh.
Bjarni
Manni væmir við að lesa þetta öfugmælabull í þér.
Nýlendukúgarar ráða ÖLLU innan þess klúbbs.
Svo er þetta á Eyjunni í dag
:
Prenta
Senda
Þín skoðun
RSS
Innlent - fimmtudagur, 16. júlí, 2009 - 10:29
Financial Times: Bretar og Hollendingar koma í veg fyrir ESB-aðild Íslands verði Icesave fellt
Sérfræðingar sem breska stórblaðið Financial Times hefur rætt við spá því að Bretar og Hollendingar muni koma í veg fyrir að Ísland fái aðild að Evrópusambandinu ef Alþingi fellir ríkisábyrgð á Icesave-samkomulaginu.
Þetta kemur fram í blaðinu í dag.
Financial Times fjallar um umræðurnar á Alþingi og í þjóðfélaginu um ESB og Icesave. Það vitnar í Svein Harald Oygard seðlabankastjóra sem segir að þjóðin geti staðið undir skuldabyrði Icesave, en segir að efasemdir séu um það meðal almennings.
Fleiri erlendir fjölmiðlar og fréttastofur fjalla um stöðu mála á Íslandi í dag, svo sem Wall Street Journal, BBC, Deutsche Welle og Reuters.
haldið þið trúgjarna lið, að eitthvað verði slakað á klónni í þessum efnum??
Ofsatrúarmenn.
Bllábjánar
Bernskir
ofl ofl.
mibbó
17. júlí, 2009 at 2:50 eh.
Bárður
Þó það nú væri að Bretar og Hollendingar vilji að Icesave klúðrið verði afgreitt. Það er ekki þar með sagt að þeir kúgi allar smærri þjóðir í ESB. Það er barnalegt, heimskulegt og óréttlátt að ætlast til þess að Bretar og Hollendingar kyngi Icesave þegjandi og hljóðalaust og bjóði okkur síðan hjartanlega velkomin í bandalag þjóða þar sem samstarf er í hávegum haft.
Icesave er vissulega vont mál og erfitt Íslendingum, en Icesave reikningarnir kostuðu Breta og Hollendinga gríðarlega fjármuni og það er ekki óeðlilegt að þeir vilji fá eitthvað af þeim tilbaka, sérstaklega í ljósi þess hvernig íslensk stjórnvöld beinlínis hjálpuðu Landsbankanum að féfletta fólk í þessum löndum.
Auðvitað eigum við ekki að sætta okkur við hvaða samning sem er og láta traðka á okkur, en að stappa niður fótunum og öskra “nei, við borgum ekki!” er blábjánalegt, barnalegt o.fl. o.fl. Hvorki mibbó né samninganefndir bæta stöðu okkar meðal þjóða með slíkum tilburðum.
17. júlí, 2009 at 2:55 eh.
joi
1. Af því að Evrópusambandið er einstakt og ótrúlega vel heppnað samstarf þjóða. Það hefur skilað friði og framförum og bætt lífsgæði fólks innan landamæra sinna og utan.
Er ekki full djúpt í árina tekið að segja það “ótrúlega vel heppnað”? ESB er runnið undan rifjum annarra samtaka. Ekki eru nú t.d. banana framleiðendur allir tilbúnir að kvitta undir að lífsgæði þeirra hafi aukist mikið út af þeirri staðreynd að þeirra afurðir voru of bognar fyrir evrópubúa.?
—–
2. Af því að við erum ekki ein í heiminum. Af því að alþjóðavæðingin hefur skellt okkur jarðarbúum í einn og sama bátinn.
Er ekki ákveðin paradox að tala í öðru orðinu um “alþjóðavæðingu” og hins vegar að loka sig að hluta til inni í samtökum sem eru byggð utan um tollamúra og að halda þjóðum sem hafa ekki líkar skoðanir í trúarbrögðum og menningu úti s.s. eins og Tyrkjum?
—–
3. Af því að með aðild fáum við á endanum gjaldmiðil sem tryggir fyrirtækjum markaði, fjármagn og stöðugt rekstrarumhverfi. Evran tryggir stúdentum betri tækifæri til mennta, almenningi sanngjarna vexti og ferðamönnum heiminn.
Það bárust nú af því fregnir í morgunað vextir væru að hækka. Ekki fóru nú fréttir að aðild betur í mannskapinn en svo. Ekki er heldur öruggt að þó Ísland gangi í ESB þá sé tekin upp Evra. Bretar, Svíar og Danir svo einhverjir séu nefndir, eru með sinn eigin gjaldmiðil. Er það endilega krónan sem er búin að koma okkur í vandræði? Gjaldmiðill einn og sér hefur ekkert vægi, heldur það sem stendur á bakvið hann. Líklega værum við jafn illa sett þó annar gjaldmiðill væri í umferð ef búið væri að ræna stórum hluta þess sem stóð á bakvið gjaldmiðilinn, sama hvaða nafni hann heitir.
—–
4. Af því að Evrópusambandið er að sumu leyti þróaðra og fullkomnara í nálgun sinni á brýn pólitísk viðfangsefni, heldur en okkar eigið stjórnkerfi og stjórnmálaflokkar.
Í evrópsku fulltrúadeildinni eða ráðherraráðinu verða ekki fulltrúar frá öllum löndum, heldur 2/3 þeirra landa sem mynda ESB, hugsanlega færri skv. Lissabon sáttmálanum. Það stjórnkerfi veldur mörgum áhyggjum. í USA er t.d. fulltrúi eða fulltrúar frá öllum ríkjum USA, en í ESB verða hugsanlega fulltrúar frá kannski 15 af 27 ríkjum. Ráðherraráðið er valdamest, það er ekki mjög þróaður valdapýramídi það.
—–
5. Af því að í Evrópusambandinu er rík lýðræðishefð, sem er byggð á grunni ítarlegrar málsmeðferðar og málefnalegrar ákvörðunartöku. Litlar þjóðir hafa mikið að segja innan Sambandsins og stærri þjóðir sem reyna að kúga minni þjóðir eru litnar hornauga.
Ertu þarna að kvóta í t.d. Breta, sem kúguðu okkur ekki svo lítið fyrir bara nokkrum mánuðum. Bretar hafa líka sýnt óbilgirni á Írlandi að margra mati. Berlusconi karlinn verður nú varla talinn mjög mikill lýðræðissinni, ok. hann skiptir brunettum og ljóskum jafnt á hvert borð, en þegar kemur að pólitík, þá á hann alla fjölmiðla (við þekkjum módelið). Hann mútar bara þeim sem standa í vegi fyrir honum. Niðurlægir andstæðinga á hvern þann máta sem honum sýnist. Ég veit ekki um þetta.
—–
6. Af því að Evrópusambandið er friðarbandalag. Það er siðlegasti leikandinn og áhrifavaldurinn í alþjóðlegum stjórnmálum.
Voru ekki Bretar þátttakendur bæði í Írak og Afganistan? Ítalir voru þar líka, meira segja Danir. Ég veit ekki til þess að það séu framin fleiri mannréttindabrot á Íslandi en í ESB löndunum? Heldur þú að ESB sé einhver orsök/afleiðing þarna? Það breyttist ekki mikið í SVíþjóð eftir að þeir gengu í ESB. Þeir héldu áfram að selja jarðsprengjur og alls kyns drápstól, sem virka jafnt á smábörn sem fullþjálfaða hermenn eftir að þeir gengu í ESB. Það eru engin tengsl þarna á milli.
7. Af því að Evrópusambandið stendur vörð um hagsmuni neytenda. Gegn ótrúlegum og vaxandi áhrifum stórfyrirtækja, þá hefur ESB sagt stopp.
Þetta hlýtur nú bara að vera grín hjá þér? Það rekur hvert hneysklið á fætur öðru Evrópu þessa dagana. Vonandi fá bófarnir þar makleg málagjöld, en þessi punktur hjá þér var nú alveg milljón.
—–
8. Af því að Evrópusambandið er lítið apparat. Það er ekki bákn.
Muahahahahahaha. Er ESB lítið apparat en ekki bákn? Þú hefðir bara átt að hafa punktana fimm eða sex. Þetta er orðið ansi þunnt hjá þér kallinn minn.
—–
9. Af því að Evrópusambandið er fremst í heimi í þróunarmálum. Já og umhverfismálum. Sem eru tvær hliðar á sama peningnum. Þeir eru miklu betri í þessu en við og okkar stjórnmálamenn. Á þessum sviðum erum við eins og illa upplýstir ríkisbubbar.
ESB ríkin losa nú engu að síður milli 15-20% af öllu útstreymi gróðurhúsalofttegunda. Til dæmis eru japanir með 4%. Afríka er með 7%. Ég veit ekki um þennan.
10. Af því að með aðild að Evrópusambandinu þá endurheimtum við hluta af sjálfstæði okkar, sem áður var tapað. Ekki sem þjóð eða þjóðrembur. Þjóðin er og verður áfram fullvalda. Heldur sem borgarar. Við fáum beina aðkomu að ákvörðunum og löggjöf sem snerta okkar daglega líf og sem eftir tilkomu EES-samningsins hafa komið til okkar fullbúnar til innleiðingar.
Erum við ekki að koma neitt að þessum málum í dag? Ég veit að Samfylking vildi ekki setja aðildarsamning í þjóðaratkvæði fyrirfram, og vildi heldur ekki að niðurstöður þjóðaratkvæðagreiðslu yrði bindandi áður en stjórnarskrá yrði breitt, sem er nú ekki sérlega lýðræðislegt, en held að flestir séu sammála um að ráðherraráðið sem tekur allar stóru ákvarðanirnar í ESB verður seint mannað neinum frá Íslandi. Það hefur enginn bent með beinum hætti á hvar öll völd Íslendinga í ráðinu eiga að koma.
—–
Ein auka ástæða. Og þetta er mín persónulega ástæða fyrir því afhverju ég vil að Ísland gangi til liðs við samstarf Evrópuþjóða í ESB.
10 b) Af því að okkur ber skylda til að leggja eitthvað af mörkum. Að taka þátt. Af því að við höfum eitthvað fram að færa.
Þetta er góður punktur. Kannski höfum við eitthvað fram að færa. Við erum enn á þessum “eitthvað fram að færa” fasanum. Við höfum eitthvað fram að færa, en vitum ekki hvað það er. En þar sem Össuri lá mikið á að koma umsókninni inn fyrir eindaga 27. júlí, þá skipti það bara engu máli. Aðal málið var að koma umsókninni inn. Hvort hún var í lagi, hvort það væri í sátt við fólkið í landinu, hvort það væri sæmilegur meirihluti á alþingi, það virðist ekki skipta neinu máli.